கோலாலம்பூர் : அண்மையில் ஜப்பானில் நிகழ்ந்த சுனாமியால் ஏற்பட்ட உயிரிழப்புகளுக்கு, ஆன்மாக்களுக்கு அமைதி வேண்டியும் உடைமைகள் உள்ளிட்ட பேரிழப்புகளுக்கு அனுதாபம் தெரிவித்தும் கோலாலம்பூர் பியூர் லைப் சொசைட்டி மண்டபத்தில் மார்ச் 26ம் தேதியன்று மாலை சர்வ சமயப் பிரார்த்தனைக் கூட்டம் நடைபெற்றது. இதில் சிறப்பு விருந்தினர்களாக உலக சமாதான ஆலய அறக்கட்டளை நிறுவனர் மகரிஷி பரஞ்சோதியார், மலேசியாவிலுள்ள ஜப்பானியத் தூதரக உயரதிகாரியும் அமைச்சருமான கோய்ச்சி இட்டோ, பியூர் லைப் சொசைட்டித் தலைவர் டத்தின் அன்னை மங்களம் ஆகியோர் கலந்து கொண்டனர். இந்நிகழ்வில் இந்து, புத்த, கிறித்துவ, இஸ்லாமிய, சீக்கிய, பகாய் உள்ளிட்ட சர்வ சமயத் தலைவர்களும் மலேசிய உலக சமாதான ஆலய ஞானாசிரியப் பெருமக்களும் கலந்து கொண்டனர்.மகரிஷி பரஞ்சோதியார் சிறப்புப் பிரார்த்தனையும் தியான வழிபாடும் நடத்தி ஜப்பான் பேரிடர்த் துயரில் உயிர் நீத்த ஆன்மாக்கள் அமைதி பெறவும் நாடு மறுவாழ்வு பெறவும் வாழ்த்தினார். அன்னை டத்தின் மங்களம் சிறப்புரைய‌ாற்றினார். பேரிடர்த் துயர உதவி நிதியாக 20,000 வெள்ளி நன்கொடை வழங்கப்பட்டது. மிக மனநிறைவான சர்வ சமயப் பிரார்த்தனைக் கூட்டமாக இது அமைந்ததென பங்குபெற்றோர் மகிழ்வெய்தினர்.

- நமது செய்தியாளர் வி.புருஷோத்தமன்